- بما انى من عائله عادية جدا زيها زى ناس كتير,فطبيعى مش هيبقى عندى عربية ف السن دا,ولا اى سن وحياتكم
- ما علينا,المهم,انطلاقا من هذه النقطه(حلوة انطلاقا دى) فانا وبلا فخر بركب الميكروباص وبعتمد عليه ف كل مشاويرى
- ليه بقى؟؟لانى قبل ما انزل لازم اسمع كام جمله كدا بعتبرهم زى الاذكار(اذكار الخروج)
- ايه هى اذكار الخروج دى؟؟؟
- انزلى بدرى عشان تلاقى مواصلات..
- متركبش تاكسى لوحدك وطبعا التاكسى عندنا بنعتبره حاجة كدا زى المناسبات..يعنى تفاريح
- الحالات الطارئه فقط(لو الدنيا بتشتى...لو عندى امتحان ومفيش مواصلات ولسه خمس دقايق بس على معاد الامتحان)
- هما دول الحالتين اللى مسموح ليا فيهم اركب تاكسى..
- بس والله الواحد اتعود
- تعرفوا انى لو فكرت اركب تاكسى ف غير الحالات الطارئه..بحس برعشة ف ايدى وانا بفتح المحفظة عشان اطلع ال4 جنيه ..خسارة فيه
- ماله الميكروباص..نص جنيه ..واقلب
- ومن هنا ..تبدأ الرحلة
- بنزل من البيت..امشى شوية..قدام بتاع الطماطم والخيار والفول والطعميه ع الصبح ايه..يوووووووه
- اول ما اوصل الى (واجهتنى)مش عارفة انا بجيب الكلام دا منين..ما علينا
- المهم..ابص لاقينى وصلت لموقف الميكروباص..ولمدة دقيقتين..استغرق ف تفكير عميق
- لاختيار الميكروباص المناسب
- الميكروباص الاول سواقه عيل صغير..ممكن يلبس بينا ف اى مكنه صينى..لأ وعلى ايه..؟؟بسيبنى منه
- اللى بعده...سواقة شاب رخم وغتيت ومفكر نفسه احمد عز..تؤ برده مش عاجبنى الميكروباص دا
- اللى بعده...سواقه مشغل الصب ..والعربيه هتقعد تتهبد بيا طول الطريق وانا مش ناقصه صداع
- سيبك
- اللى بعده...العربية قديمة والكراسى مخلعه..هنفضل نتهز طول الطريق بقى ولا ايه؟؟
- اللى بعده..شكل العربية مش عاجبنى خالص..لونها وحش
- اللى بعده..السواق عجوز وبيمشى بمعدل 3 سم فالساعة..لا لالالا
- اللى بعده..ايوا هى دى...عربيه اخر موديل..كراسى متنجده جلد..والشبابيك بتتفتح وتتقفل عادى يعنى(سبحانك الله)
- وشاشه ال سى دى..واخر عظمة
- ايون...هى دى
- طبعا كل التفكير دا..لمده دقيقتين..من نص الشارع لحد ما اوصل للموقف
- وبعد اختيار الميكروباص الافضل..وبعد ما امسك البتاع بتاع الباب..لاقى اللى بيزعق من بعيد(انتى يا ابله..الميكروباص اللى قدام دا هو اللى بيحمل...)
- ادعى عليك بايه بس يا شيخ؟؟؟
- وطبعا انا بنسحب من هدوء حفاظا على كرامتى..واسيب بقى السواقين يتخانقوا مع بعض(وانت بتحمل قبلى ليه.؟؟؟.روح يلعن.......................) احم احم
- انتوا ادرى طبعا باللى بيحصل
- المهم..باخد نفسى واطلع على اول ميكروباص
- العربيه نصها مليان(ونصها رجاله)
- طيب اقعد فين ولا فين..؟؟اقعد فى الكرسى القلاب اللى قبل الكنبه..بس كدا السواق هيرخم عليا ويقولى(لسه ف كرسى ورا يا ابله)
- طيب اعمل ايه ورا رجالة ومش عايزة اركب ورا انا اعمل ايه؟؟؟..مش هعمل حاجة بضطر اركب غصب عنى
- وعينك ما تشوف الا النور..ناس ريحتها تقرف..وبيصبوا عرق من كل حته فيهم
- اجى افتح الشباك ..مش بيتفتح(هو بيتقفل بس)وبعدين اساسا مقبض الشباك مكسور
- او مش موجود اصلا..فبضطر احط مناخيرى ناحية الفتحتين بتوع الشباك( الديرتين الضغننين دول اللى فوق بعض
- وشوية..والاقى الموبايلات الصينى تشتغل
- الو..اولوووووووووووو..الوووووووووووووووو..ايوا يا عباس..انى بعتلك الواد بالحاجة و...........
- ورغى كتييييييير انا مش مضطره انى اسمعه بس لازم اسمعه لان حضرته فاتح الاسبيكر مش فاهمه ليه؟؟)
- ,بعد ين يجى راجل رزل يقعد على الكرسى القلاب اللى قدام رجلى..ويتجعس اوى سيادته..ويرجع ضهر الكرسى ع الاخر..وانا رجلى تتفرم عادى خالص
- افضل ازق فيه برجلى..لحد ما سيادته يحس..يقوم باصص وار..ويرمينى بنظرة قاسية..مؤلمه ,,موجعه..كانه بيقولى (والله لو ما بطلتى زق لــ.....................)
- بعد كدا ينزل الراجل المقزز اللى جمبى..وتيجى مكانه ست عجوزة(معاها سمك لسه بيرفس ف الميه)(والكيس بيبقى مخروم كمان)وريحة السمك ايييييييييييييه..تقلب العربية وتقلبلى معدتى معاها..دا غير الكيس اللى بيسقط ميه على رجلى وعلى الشراب الجديد
- المهم..الست تركب من هنا..وتفضل طول ما هى قاعد تبصلى من فوق لتحت..وتبصلى بتعجب شديد,,كانى مخلوقه فضائيه..واول ما اقرر انى افتح الشنطة واطلع الاجرة
- لاقى عينها راشقه جوا الشنطه..يعنى متوقعه اطلعلها فيل من الشنطة ولا ايه؟؟الله اعلم
- شوفوا بقى اللى يفقع المرارة
- اطلع النص جنيه..واجى ادى للراجل الرزل اللى (ما زالت حرب الزق ف الكرسى مستمرة بينى وبينه)
- تقوم هى اخده النص جنيه من ايدى وحاطه عليه ربع جنيه..وتدفع اتنين
- طيب ما تقولى من الصبح يا حجة وانا ادفعلك ونخلص..بدل الرعب اللى انتى مربياهولى من الصبح
- الحمد لله قربت اوصل...على جمب لو سمحت
- وطبعا لو سمحت دى باخد عليها تريقة لاحد اخر الشارع(اصلك مش متعود على ان حد يحترمك يا معفن)
- وطبعا لانه مشغل الاغانى على الاخر(الاغانى اللى كلها نداله دى,واه يا با يا با.يابايايابا)وكدا يعنى
- طبعا مش بيسمعنى اللى ف اخر الشارع
- اقوله المطرى لو سمحت..ينزلى عند البندر..حسبى الله
- واللى زاد وغطى..لما ربنا يكرمه ويسمع ويقف..يسأل باعلى صوت(حد ناااااازل)لأ ابدا دا انا بضحك معاك
- خخخخخخخخخخ
- تقوم بقى الست اللى جمبى تقوله
- لأ انا مش نازله هنا يابنى
- يعنى يا حجة هو مفيش حد غيرك ف الميكروباص
- انتى مش نازله هنا..بس انا نازله
- وطبعا السواق يسمع كلمه انا مش نازله يا بنى..يقوم حضرته مكمل لحد باب الحرس
- ااااااااااااااااااااااااااااااااااه يانى
- وطبعا ماباليد حيله..غير انى ادعى عليه ف وشه واطلع اجرى..واعدى الناحية التانيه واركب ميكروباص تانى بنفس المعاناه..عشان اوصل للمكان اللى المفروض كنت انزله من ربع ساعة
ورغم كل هذه المعاناه,مازال التمسك بالميكروباص يزداد..وبنركبه كل يوم..وبنتصور فيه كمان
وحسبى الله ونعم الوكيل
ليست هناك تعليقات:
إرسال تعليق